حکومەتی هەرێمی كوردستان
SAT, 25 OCT 2014 00:16 Erbil, GMT +3

ئەڵمانیا لە بوارەکانى خوێندنی پیشەیی هاوکاری هەرێمی کوردستان دەکات

MON, 2 APR 2012 17:36 | KRG.org

ئەمڕۆ دووشەممە 2/4/2012 سەفین دزەیی وەزیرى پەروەردە، بەئامادەبوونی ئەحمەد گەل بەڕێوەبەرى گشتى خوێندنی ئامادەیی و پیشەیی و سەروەت مستەفا بەڕێوەبەى گشتى بیناسازی لە وەزارەتی پەروەردە، پێشوازی لە شاندێکی رێکخراوی (GIZ)ى ئەڵمانی کرد کە پێکهاتبوو لە جۆزیڤ فیشەر بەڕێوەبەرى گشتی پرۆژەکان و بێرنارد ستریچەرو یوسف تۆما راوێژکاران لە رێکخراوەکە.

لەدیدارێکی هاوبەشدا پەرەپێدانی خوێندنی پیشەیی و بەستنەوى بەشەکانی بەبازاڕی کارکردن، لەگەڵ پرۆژەى دروستکردنی سێ کۆمەڵگەى هاوچەرخی خوێندن و راهێنانی پیشەیی لە هەرسێ پارێزگاى هەولێر و سلێمانی و دهۆک تاوتوێ کرا، کە بەگوژمەى 20 ملیار دینار بۆ هەر کۆمەڵگەیەکى پیشەیی و لەسەر رووبەرى 250 دۆنم زەوی لە هەریەکە لە هەولێرو سلێمانى و دهۆک جێبەجێ دەکرێن و ئەم رێکخراوە ئەڵمانییە لە بوارى دابینکردنی ئامێرو کەلوپەلە پیشەییەکان هاوکارى وەزارەتی پەروەردە دەکات.


لایەنی ئەڵمانی تەواوی ئامادەیی خۆى بۆ پەرەپێدانی کەرتی خوێندنی پیشەیی لە هەرێمی کوردستان دووپاتکردەوەو ئاماژەشی بۆ گرنگی ئەو بەشانە کرد لە بوژانەوەى ئابوورى و پیشەسازی و کشتوکاڵی.

لەبەرامبەریشدا سەفین دزەیی سوپاسی هاوکاری بەردەوامی رێکخراوی (GIZ)ى ئەڵمانی کرد لەپاڵپشتیکردنی بوارەکانی خوێندنی پیشەیی و ئەزموونی پیشەیی وڵاتی ئەڵمانیای فیدراڵی بە نموونەیەکی سەرکەوتووی هەرە گرنگی ئەو بوارە لە تەواوی جیهاندا وەسفکرد.

حکومەتى هەرێمی کوردستان بەهەماهەنگی لەگەڵ وەزارەتی پەروەردە، بەگووژمەى 60ملیار دینار پرۆژەى ئەم سێ کۆمەڵگە پیشەییە لە هەولێر و دهۆک و سلێمانى ئەنجامدەدات و نزیکەى 10000 قوتابی و خوێندکار لەهەر پارێزگایەکی هەرێم، سوودمەند دەبن لە خوێندن و راهێنانی پیشەیی لەم سێ کۆمەڵگەیەدا، کە هەریەکەیان زیاتر لە بیست و هەشت بەشی هەمەجۆر لە بوارەکانى کشتوکاڵی و ئاودێرى و پیشەسازی و بازرگانى و ئاژەڵدارى و بەخێوکردنی هەنگ و چاککردنەوەى ئۆتۆمبێل و کۆمپیوتەر و چەندین بەشی تر لەخۆدەگرێت.

شایانی باسە حکومەتى هەرێمی کوردستان بایەخێکی بەرچاو بە گەشەپێدانى خوێندنی پیشەیی دەدات چونکە سەرجەم بەشەکانى خوێندنی پیشەیی بە شادەمارى کەرتی ئابوورى و وەبەرهێنانی هەرێمی کوردستان دادەنرێن و هەوڵیش دەدرێت دەرچووانى ئەم بەشانە راستەوخۆ بەبازاڕى کار ببەسترێنەوەو لە پرۆسەى وەبەرهێنان و بوژانەوەو ئاوەدانکردنەوەى هەرێمی کوردستان رۆلی کارای خۆیان ببینن.